ШҚО экология департаментінің экс-басшысы пара үшін 10 жылға сотталды

Шығыс Қазақстан облысы бойынша экология департаментінің бұрынғы басшысы, 62 жастағы Мамай Бұтабаев ірі көлемде пара алғаны үшін сот үкімімен кінәлі деп танылды, деп хабарлайды Orda.kz.

Бұл – өңірдің экологиялық саласында бір жыл ішінде шыққан үшінші сыбайлас жемқорлық ісі.

Бұтабаев 2024 жылдың 13 шілдесінде ұсталды. Сыбайлас жемқорлыққа қарсы қызмет оның әрекетін қылмыс үстінде әшкерелеген. Сол күні ол жол құрылысына жауапты компания өкілінен 8,5 миллион теңге алған. Тергеу мәліметінше, бұл тек алдын ала төлем болған, ал шенеунік заңсыз жолмен барлығы 130 миллион теңге алуды жоспарлаған.

Параны берген адам — «Синьсинь» компаниясының мемлекеттік органдармен байланыс жөніндегі өкілі Қанат Дырынбаев. Компания сол кезде «Қалбатау – Майқапшағай» автожолының бір бөлігін жөндеп жатқан. Тергеу болжамы бойынша, Бұтабаев компанияға экологиялық заң бұзушылықтар үшін жауапқа тартылмауға уәде берген.

Сот барысында экс-шенеунік кінәсін мойындамаған, ал адвокаты Ерік Халелов айыптау тергеудің болжамына негізделгенін және оны растайтын нақты дәлел жоқ екенін хабарлады.

Дегенмен, сот Бұтабаевты кінәлі деп танып, 10 жыл 1 айға бас бостандығынан айырды. Қанат Дырынбаев та осындай мерзімге сотталды. Ол пара беру және қылмыстық жолмен алынған табысты заңдастыру баптары бойынша жауапқа тартылған.

Іс бойынша тағы бір кәсіпкер — «Инком-Шығыс» ЖШС иесі Марат Ақылғазин сотталды. Ол заңсыз табысты жасыруға көмектеспек болғаны үшін алты жылға бас бостандығынан айырылды. Тергеу дерегінше, ол Дырынбаевқа ақшаны өз фирмасы арқылы рәсімдеуге көмектеспек болған.

Айыпталушылардың қорғаушылары үкімге апелляциялық шағым түсіруі мүмкін.

Мамай Бұтабаев экология департаментін небәрі жарты жыл басқарған. Бұған дейін ол Абай облысында қызмет атқарған. Одан бұрынғы басшы Данияр Әлиев те пара алғаны үшін сотталған болатын.

Әлиевтің қамауға алынуына дейін бір ай бұрын оның орынбасары Рауан Тұраров та ұсталды. Ол алтын өндіретін компаниядан пара алғаны дәлелденіп, жеті жылға сотталды.

Бұған қарамастан, өңірде экологиялық заң бұзушылықтар азаймай отыр. Биыл ШҚО-да бірқатар ірі кәсіпорын эмиссия лимиттерін асырып, қалдықтарды дұрыс сақтамағаны үшін миллиардтаған теңге айыппұл төлеген. Бұтабаев ісінде аты аталған «Синьсинь» компаниясы да бір миллиард теңгеден астам айыппұл төлеген.