ШҚО-да ежелгі беймәлім артефактілер табылды

«Берел» мемлекеттік тарихи-мәдени мұражай-қорығы ШҚО Қатонқарағай және Үлкен Нарын аудандарында археологиялық зерттеулер жүргізеді.

Бұл туралы мәдениет министрлігінің баспасөз қызметі хабарлайды.

Археологтар бұрын соңды ашылмаған 20 жерлеу орны мен елді мекенді тапты, олардың 14 -інде қазба жұмыстары жүргізілді. Қола дәуірінен қазіргі заманға дейінгі археологиялық орындарда ғалымдар көптеген артефакт орнын ашты.

«Табылған заттар қатарында металлургиялық орталықтың орны бар ерте темір дәуірінің қонысы, ХІХ ғасырдың аяғы мен ХХ ғасырдың басындағы қазақ қыстауы және 12 жерлеу орны бар. Археологтар сонымен қатар ертедегі сақ және көне түркі жылқы жабдықтарын, қыш ыдыстарды, Пазырық мәдениеті әшекейлерін, ежелгі түркі дәуірі  кезеңіндегі қола төсемдер және тиындар,белдік, ілмек, қимақ сияқты әртүрлі жәдігерлер тапты» деп хабарлады мәдениет министрлігінің баспасөз қызметі.

Бұған қоса ғалымдар аймақтың тарихи-мәдени мұрасын қорғау және насихаттау үшін жергілікті тұрғындармен және билік органдарымен кеңесіп,  түсіндіру жұмыстарын жүргізеді. Аймақтағы қазба жұмыстары мен ғылыми ізденістер 2024 жылдың соңына дейін жалғасады.