Самокат мінетіндерге қатысты нақты шаралар қабылданады

Қазақстан Республикасы Ішкі істер министрлігі Әкімшілік полиция комитетінің төрағасы Қайсар Сұлтанбаев Орталық коммуникациялар қызметіндегі брифингте электрсамокаттарды пайдалану ережелерінің бұзылуы жаппай сипат алып жатқанын мәлімдеді, деп хабарлайды Orda.kz.

Электрсамокат мінетіндер тротуарда қатты жылдамдықпен жүреді, бұл өз кезегінде жаяу жүргіншілерге қауіп төндіреді. Сонымен қатар, самокат жалға беретін компаниялар жылдамдықты алты километр сағаттан аспайтындай шектеу туралы уәде бергенімен, ол талаптар орындалмай отыр.

«Бүгінгі күні олар бұл ережелерді сақтамайды. Сол себепті аталған компаниялардың басшыларына қатысты заң аясында шаралар қабылданатын болады», — деп атап өтті Сұлтанбаев. 

Бөлек бір мәселе — самокаттардың ретсіз тасталуы. Көлік құралдарын кез келген жерге тастап кететіндер көбейген. Бұл — қаладағы жүргіншілер қозғалысына кедергі келтіретін факторлардың бірі. Осыған байланысты Ішкі істер министрлігі әкімдіктермен бірлесіп арнайы тұрақ орындарын ұйымдастыруды және ережені бұзғандарды жауапкершілікке тартуды жоспарлап отыр.

Әкімшілік полиция комитетінің басшысының айтуынша, қазіргі жағдай мінсіз емес, бірақ тәртіп орнатылады.

 
Былтыр Қазақстанда электрлі самокаттардың қатысуымен болған жол-көлік оқиғаларында 2 адам қаза тауып, 80 адам жарақат алды.

Қалалық полиция басқармасының дерегіне сүйенсек, еліміздің ең ірі мегаполисі Алматыда тек осы жылы 2127 жол апаты болып, 24 адам көз жұмып, 2323 адам дене жарақаттарын алды.