Салтанат Нүкенованың өлімі: Бақытжан Байжанов рақымшылық сұрады

Салтанат Нүкенованың өліміне қатысты қылмыстық іс бойынша сотталған Бақытжан Байжанов амнистия туралы өтініш түсірді, деп хабарлайды Orda.kz. 

2024 жылдың маусым айының соңында сот үкімі заңды күшіне енді. Үкімге сәйкес, Байжанов аса ауыр қылмысты жасырғаны үшін кінәлі деп танылып, төрт жылға бас бостандығынан айырылды. Бұл бап бойынша сотталғандарға қатысты амнистия заңы жазаның бестен бір бөлігіне қысқартады. Бұл шамамен тоғыз айға тең.

«2024 жылғы 9 шілдеде Степногор аудандық сотына Бақытжан Байжанов амнистия туралы заңға сәйкес жаза мерзімін қысқарту туралы өтініш жолдады. Өтінішті қарау күні әлі белгіленген жоқ», – деп жазылды хабарламада.

2023 жылғы 26 тамызда Байжанов үкімді қайта қарау жөніндегі кассациялық шағымын қайтарып алған болатын. Оның адвокаты бұл шешімнің себебін түсіндірмегенімен, сотталушының кез келген уақытта қайта өтініш түсіруге құқы бар екенін, бұл мәселе бойынша талап қою мерзімі жоқ екенін атап өтті.

2024 жылғы 23 маусымда Қазақстан Конституциясының 30 жылдығына орай президент амнистия туралы заңға қол қойды. Бұл заң 15 мыңнан астам сотталған азаматқа қатысты қолданылады. Солардың шамамен екі мыңы түрмеден босап шығады. Ал қалғандарының жаза мерзімі қысқарады. Амнистияны қолдану мәселелері бойынша материалдар 2025 жылдың соңына дейін соттарға келіп түседі.