Ресейдегі елші Дәурен Абаев халықтың 95 пайызы орыс тілінде сөйлейтінін елдің мықты тұсы ретінде атады

Ресей Федерациясындағы Қазақстанның елшісі Дәурен Абаев Ресейдің ТАСС агенттігіне берген сұхбатында қазақ халқының 95 пайызы орыс тілінде сөйлей алатынын елдің мықты тұсы деп атады, деп хабарлайды Orda.kz.      

 Қазақстан Республикасының Ресей Федерациясындағы елшісі Дәурен Абаев Қазақстан халқының 95 пайызы орыс тілінде сөйлей алатыны – елдің мықты жағы деп санайтынын атап өтті, деп мәлімдеді ТАСС агенттігі.

«Қазақстанда, меніңше, халықтың 95 пайызы орыс тілін біледі және біз орыс тілін білу – біздің артықшылығымыз әрі күшіміз деп санаймыз. Әрине, басты басымдық  мемлекеттік тіліміз – қазақ тілінде және оның рөлі жыл сайын артып келеді. Бірақ сонымен бірге, елімізде барлығының орыс тілін білетініне біз өте қуаныштымыз, өйткені бұл  тағы да қайталап айтамын – біздің  артықшылығымыздың бірі», – деді дипломат. 

Елші атап өткендей, Қазақстандағы шамамен 7 мың мектептің 3 мыңы орыс тілінде  білім береді. Сонымен қатар ол орыс тілін оқыту барлық мектептерде міндетті екенін де мақтанышпен атап өтті.

«Орыс тілін біз Қазақстанда бәсекеге қабілеттілік беретін тіл деп санаймыз» , – деді ол. 

2023 жылы Мәжіліс депутаты Қазыбек Иса Қазақстан Республикасы Жоғарғы соты мен М.Нәрікбаев атындағы ҚазақГЗУ өткізген «Құқық жүйесіндегі қазақ тілінің мәселелері және оларды шешу жолдары» атты республикалық ғылыми-тәжірибелік конференцияда Конституциядан орыс тілін алып тастауды ұсынды.

2024 жылы мәжіліс депутаты Дәулет Мұқаев қазақ сыныптарында оқытылатын орыс тілі пәні бағдарламасына қатысты өз пікірін білдірді. Оның айтуынша қазақ сыныптарындағы екінші сынып оқушыларына арналған орыс тілі оқулықтары тым қиын. Сабақ бастала салысымен балаларға күрделі тапсырмалар беріледі. Бірден сөйлем құрау, өлең жаттау секілді күрделі тапсырмалар жүктеледі. Депутаттың пікірінше, алдымен алфавиттен бастап үйрету қажет.

Еске салсақ, жақында Алматы қаласының Бостандық ауданында қазақ мектебі болады деп күтілген жаңа білім ордасында орыс сыныптарының ашылуы ата-аналардың ашу-ызасын туғызып, желіде қызу пікірталас тудырып, ата-аналар жаңа мектептің аралас тілде ашылғанына қарсы шығып, «Тек қазақ тілінде ашылсын» деп талап етті.