Qazaq Air жолаушысы алкоголь бермегені үшін бортсеріктерге тап берді

Qazaq Air әуе компаниясының Астана – Новосібір бағыты бойынша рейсі кезінде жолаушыға қосымша алкоголь беруден бас тартылған соң, ол бортсеріктерге шабуыл жасаған, деп хабарлайды Orda.kz.

Оқиға 20 қазан күні болған. Астанадан Новосібірге ұшып шыққан рейсте мас жолаушы жанжал шығарған. Ұшақ қонғаннан кейін ереже бұзған адам полиция қызметкерлеріне тапсырылған.

Әуе компаниясының хабарлауынша, даудың себебі – жолаушы әйелге қосымша алкоголь құюдан бас тартылған. Осыдан кейін ол бортсеріктерге қол көтерген.

«Ұшақ Новосібір әуежайына сәтті қонды, онда ереже бұзған жолаушы полицияға тапсырылды. Мұндай әрекет заң бойынша жауапкершілікке тартылады, тіпті бас бостандығын шектеуге дейін», – деп түсіндірді әуе компаниясы.

Компания өкілдері сондай-ақ, әуе көлігінде тәртіп бұзған адамдар қара тізімге енгізілетінін, бұл оларға болашақта әуе компания қызметтерін пайдалануға тыйым салатынын атап өтті.