«QAITADAN» фильмі үш аптада 1 миллиард теңге жинады

«QAITADAN» фильмі 1 млрд теңге қаражат жинады, деп хабарлайды Orda.kz.

Биыл 4 қыркүйектен бастап режиссер Думан Еркінбектің  «QAITADAN» фильмі прокатқа шықты. Картина 1 аптаның ішінде 400 млн қаражат жинап, отандық бокс-офисте көш бастаған еді. Бүгінде фильм үш апта ішінде 1 млрд теңгеден астам табыс жинап, отандық кинопрокатта көш бастады. 

Мәдениет және ақпарат министрлігінің мәліметінше, кино өндірісіне жұмсалған мемлекет қаражатынан бес есе артық табыс тапқан алғашқы жоба.

 Фильмді «Dala Cinema» кинокомпаниясы ҚР Мәдениет және ақпарат министрлігі мен Ұлттық киноны қолдау мемлекеттік орталығының қолдауымен түсірген.

Туынды көрерменге голливудтық «уақыт ілмегі» (day loop) мотивін қазақы болмыс және өзекті әлеуметтік мәселелермен сәтті үйлестірген бірегей туынды. Түсірілім тобы су тасқыны шынайы шығуы үшін қолдан дамбы тұрғызып, оны жарған. Ауылдың макетін жасап, су басып жатқанын түсірген.