Петропавлда мектеп оқушысының қатарластарынан зәбір көргені туралы видео тарады

Петропавлда қыз балалардың өз қатарласын ұрып-соққан сәті түсірілген бейнероликті «Орда» редакциясына бала тәрбиесіне бейжай қарамайтын азамат жолдады, деп хабарлайды Orda.kz.       

Видеодағы әңгімеден қыздың жәбір көрсеткендердің біріне арыз жазуға ниеттенгені белгілі болады. Бұл оның кезекті «жазалануына» себеп болған.

Оқиға тамыз айының соңында болған. Алайда бұл жағдайға қоғам назарын тек оқу жылы аяқталған соң ғана аударды.  

Зардап шеккен қыздың таныстары жергілікті журналистерге оқиғаның егжей-тегжейін айтып берген. Олардың айтуынша, мектеп әкімшілігі бұл жағдайды жасырмақ болған, бірақ іске полиция араласқан соң ғана қоғам назарына ілінген.

«Жедел-іздестіру шаралары барысында қатарластарынан жүйелі түрде психологиялық және физикалық қысым көрсетілгені, оның ішінде бейнематериалдар арқылы дәлелденгені анықталды. Оқиғаға қатысы бар алты кәмелетке толмаған жасөспірім анықталды. Қазіргі уақытта тергеу жүргізіліп жатыр», деп хабарлады Солтүстік Қазақстан облыстық Полиция департаментінің баспасөз қызметі. 

Екі жасөспірім мен төрт ересекке қатысты әкімшілік құқықбұзушылық туралы хаттама толтырылды. Сонымен қатар, қорқытып алуға қатысты қылмыстық іс бойынша сотқа дейінгі тергеу басталды.

Мектеп әкімшілігі мен өзге де ресми органдар әзірге пікір білдірген жоқ.

Айта кетейік, 30 мамыр күні Петропавлда №14 орта мектептің алты оқушысы өз қатарласын үнемі ұрып-соғып, қорлағаны туралы ақпарат тараған болатын.