Павлодарда ер адам отбасын өрттен құтқарып, өзі ажал құшты

Павлодар облысында ер адам ерлікпен отбасын өрттен құтқарып қалғанымен өзі жантәсілім етті, деп хабарлайды Orda.kz.

Қайғылы оқиға кеше, 9 қазан күні таңертең Тереңкөл ауылындағы жеке тұрғын үйде болған. Өрт сөндірушілер оқиға орнына келгенде өрт үйдің шатырына дейін жеткен.

Павлодар облысы төтенше жағдайлар департаментінің мәліметінше, құтқарушылар үйден ес-түссіз  жатқан 1982 жылы туған ер адамды алып шығып, жедел жәрдем қызметкерлеріне тапсырылған. 

Марқұм өрт сөндірушілер келгенге дейін терезе арқылы 33 жастағы жұбайы мен 8, 6 және 2 жастағы үш баласын сыртқа шығарып үлгерген. Ер адам аудандық ауруханада көз жұмды.

Айта кетейік, дәл осы күні Павлодар облысында жеке тұрғын үй өртеніп, 6 адам тірідей жанып кетті.