Орал маңындағы ауылда оқушылар пышақтасты

Батыс Қазақстан облысы Теректі ауданындағы мектептердің бірінде оқушы қатарласын пышақтап тастады, деп хабарлайды Orda.kz.

Оқушылар арасындағы жанжал өршіп, соңында бір оқушы екіншісіне пышақ сұғып алды. Жарақат алған оқушы өз бетімен жедел жәрдем көлігіне жетіп, ауруханаға жатқызылды. Зардап шеккен баланың жағдайы бір қалыпты. Ал жарақат салған бала ұсталды. Қазіргі уақытта осы факт бойынша сотқа дейінгі тергеу жүріп жатыр. Полиция басқармасы оқиғаға қатысы бар кәмелетке толмағандардың заңды өкілдері балаларды тәрбиелеу жөніндегі міндеттерді тиісінше орындамағаны үшін жауапқа тартылатынын мәлімдеді.

Балалар құқығын қорғаушы Динара Зәкиева шабуылдаған баланың анасынан айырылғанын, әкесі мен әжесінің қолында тұратынын хабарлады. Оның айтуынша, отбасының баспанасы жоқ, бұрын апатты жағдайдағы үйде тұрған, жуырда басқа тұрғын үйге көшкен. Құқық қорғаушының сөзінше, мектепте бұл жасөспірім ерекше бақылауды қажет ететін оқушылар тізімінде болмаған.

«Қандай жағдай болса да, бұл қылмысты ақтамайды. Алайда бұл балалармен және олардың отбасыларымен жұмыс істеудің, жеке профилактикалық шаралардың сапасына назар аударудың қажет екенін көрсетеді», – деді Динара Зәкиева.

Материалдар аудан әкімдігі жанындағы кәмелетке толмағандар істері жөніндегі комиссияға жіберілді. Қылмыстық істі тергеуді Батыс Қазақстан облысы полиция департаменті басшылығы өз бақылауына алған.