Нұрсұлтан Назарбаевтың суреттері 150 мың теңгеден сатылып жатыр

Қазақстанның танымал маркетплейстерінің бірінде экс-президент Нұрсұлтан Назарбаевтың суреттерін жинаған фотоальбом 149 мың теңгеден сатылып жатыр, деп хабарлайды Orda.kz.

ҚР Сенатының төрағасы болған Нұртай Әбіқаевтың 1997 жылы жарық көрген «Нұрсұлтан Назарбаев. Қазақстанның тұңғыш президенті» атты фотоальбомы сатылымға шықты.

Сатылымдағы фотоальбомда президент болған кезіндегі Нұрсұлтан Назарбаевтың жұмысшылармен, сарбаздармен және студенттермен бірге түскен суреттері бар.

Кітап сипаттамасында автор бұл туындыны жай ғана фотоальбом емес, «президенттің энергиясы мен құштарлығы сезілетін рухани естелік» деп сипаттайды. Бұл фотоальбомды ай сайын бөліп, 12 мың теңгеден төлеу арқылы сатып алу мүмкіндігі де бар.

Нұртай Әбіқаев Назарбаевтың ең жақын серіктерінің бірі болған. Ол кезінде президент әкімшілігінің басшысы, ҰҚК төрағасы және бірінші көмекшісі қызметтерін атқарған. Бүгінде оның есімі көбіне «ескі Қазақстанмен» байланысты айтылады.