Назарбаев пен Саркозидің туындысы Франция бақылауында

Француз-германдық Airbus Helicopters компаниясы «Kazakh Eurocopter Kazakhstan Engineering» ЖШС жарғылық капиталындағы үлесін 90%-ға дейін ұлғайтты, деп хабарлайды Orda.kz  сайты «Новое поколение» басылымына сілтеме жасап.

Eurocopter Kazakhstan Engineering компаниясы 2011 жылы Қазақстанның тұңғыш президенті Нұрсұлтан Назарбаев пен Францияның сол кездегі президенті Николя Саркозидің бастамасымен құрылған. ЖШС жарғылық капиталының жартысы Airbus Helicopters-ке, жартысы «Қазақстан инжиниринг» ұлттық компаниясына тиесілі болды.

Eurocopter Kazakhstan Engineering компаниясы ребрендингін ресми түрде жариялады. Компания атауын Airbus Helicopters Kazakhstan Engineering деп өзгертті. Шешімге түсініктеме берген Airbus вице-президенті Томас Хейн «Қазақстан Инжиниринг» ұлттық компаниясы  «стратегиялық менеджментке қатысуды жалғастыру және жоғары технологиялық салалардағы елдің ұлттық мүдделерін қолдау» үшін бірлескен кәсіпорындағы 10% үлесін сақтап қалғанын айтты.

Airbus соңғы айларда Қазақстанмен ынтымақтастықты белсенді түрде кеңейтуде: сәуір айында компания Қорғаныс министрлігі қажеттіліктері үшін Қазақстан Республикасына алғашқы A400M әскери-көлік ұшағын жіберетіні туралы хабарланған болатын. Ал Eurocopter Kazakhstan Engineering компаниясы шығарған тікұшақтарды «Қазавиақұтқару» пайдаланады.

Осыдан он жыл бұрын, 2014 жылы Eurocopter туралы шағын БАҚ жанжалынан белгілі болды: француз БАҚ-ы «Нұрсұлтан Назарбаев Николя Саркозиден 45 Eurocopter тікұшағын сатып алу үшін олигарх Патох Шодиевке қылмыстық қудалаудан құтылуға көмектесуді сұрады»  деген ақпарат таратқан болатын.

Сол кезде Қазақстанның тұңғыш президенті бұл қауесеттерді үзілді-кесілді жоққа шығарды. Кейіннен БАҚ-та биылғы шілде  айында Airbus шығарған жаңа ұшақтарды «Эйр Астана» тобы жалға алатыны туралы ақпарат пайда болды.