Мүгедек баласына қарайласпаған депутатты «Amanat» партиясы қорғаштап отыр ма?

Журналист Ботакөз Омарова әлеуметтік желідегі парақшасында «Amanat» партиясы фракциясының жетекшісі Елнұр Бейсенбаев пен  Кентау мәслихатының депутаты Арман Шалданбаевтың бірге түскен суретін жариялады. Кейін Елнұр Бейсенбаевтан «Amanat» партиясының депутаты Арман Шалданбаевтың жүздеген миллион теңгесі қайдан келгенін сұрап, сауал жолдады, деп хабарлайды Orda.kz. 

Журналистің айтуынша, сот құжаттарында оның шоттарына жүздеген миллион теңге түскені көрсетілген. Бірақ декларациясында кірісі нөл деп көрсетілген. Сонымен қатар, бұрынғы әйелі мүгедек баласын емдету үшін мүлкін сатып жүргенде, депутат BMW X7 көлігін алып, жалған «қарыздар» рәсімдеген.

Сот шешімі бойынша ол бұрынғы жұбайына 83 миллион теңге төлеуге міндеттелген, бірақ депутат шешімді орындаудан бас тартқан. 

«Ол сот процесі алдында «Amanat» партиясы фракциясының жетекшісі Елнұр Бейсенбаевпен бірге түскен суретін әлеуметтік желіде жариялаған. Бұл жай ғана сәйкестік пе? Әлде қысым ба? Мүмкін, ишара ма?..», — дейді Ботакөз Омарова.

Сондай-ақ журналист Шалданбаевтың 2019 жылы «Rixos Borovoe» қонақ үйінде жанжал шығарғанын еске салды. Ол достарымен бірге Асылбек Мәжіков деген азаматқа шабуыл жасаған. Оқиға бақылау камераларына түсіп қалған. Күзет полиция шақырған. Барлық күдіктілер ұсталып, қамауға алынды. Бұл жағдай 5 желтоқсанда болған. Алайда, 12 желтоқсанда іс «тараптардың татуласуына байланысты» тоқтатылды.

«Бір аптада пышақ жарақаты болған топтасқан төбелес тоқтатылып, дәлелдер жойылды.
Ал мүгедек баласының емін жайлы ұмытқан әке — әлеуметтік желіде сән-салтанатты өмірін көрсетуге әуес», — деді Ботакөз Омарова. 

Бейресми дерек бойынша, бұл жағдайдың сол кездегі облыс әкімі болған Өмірзақ Шөкеевпен байланысы болуы мүмкін екен.

Ботакөз Омарова Бас прокуратураға, ҚМА, ІІМ және «Amanat» партиясына журналистік сауал жолдады. 

Айта кетейік, Нұрсұлтан Назарбаев тұңғыш президент мұражайында экскурсия кезінде көзге түсті.