Министр Hubble Network және Astranis компанияларының басшылығымен кездесу өткізді

АҚШ-қа жұмыс сапары аясында министр Жасұлан Мәдиев Hubble Network компаниясының негізін қалаушы және атқарушы өкілі Алекс Харомен, сондай-ақ Astranis компаниясының өкілдерімен кездесу өткізді.

Бұл туралы цифрлық даму, инновациялар және аэроғарыш өнеркәсібі министрлігі хабарлады.

Кездесулерде ғарыштық технологиялар мен спутниктік коммуникациялар саласындағы ынтымақтастық перспективалары талқыланды. Hubble Network-пен ҚР аумағында IoT-құрылғыларды орналастыру бойынша пилоттық жобаны іске қосу туралы келісімге қол жеткізді.

«Компания шешімдерін пайдалану сенімді байланыс пен дерек алмасуды қамтамасыз ете отырып, еліміздің барлық өңірлерінде IoT-құрылғыларды қолдану мүмкіндіктерін едәуір кеңейтуге жол ашады. Мұнай және газ салаларындағы датчиктерге, сондай-ақ жүк вагондарын треккингке қолдануды жоспарлап отыр» деді министірлік.

Сондай-ақ қазақстандық делегация Astranis компаниясының өндірістік қуаттарымен танысты. Кездесу шеңберінде тараптар «лизинг» моделі бойынша Astranis аппаратын пайдалану мүмкіндігіне мұқият талдауды жүргізуге келісті.

Бұл Қазақстанның спутник өндірісіне жүздеген миллион доллар инвестициялау қажеттілігінсіз деректерді берудің жоғары жылдамдықты спутниктік байланыс арналарын ұйымдастыру қажеттілігін жабуға мүмкіндік береді.