Михаил Ломтадзе ағылшын футбол клубын сатып алды

Kaspi.kz негізгі акционерлерінің бірі Михаил Ломтадзе ағылшындық Wycombe Wanderers футбол клубының 90 пайызын сатып алды. Ломтадзе мырза Эдуард Вышняков пен Дэн Райспен бірге клубтың директорлар кеңесінің мүшесі болды.

Wycombe Wanderers ресми мәлімдемесіне сәйкес, футбол клубының 90% иелік ететін Feliciana EFL Ltd Михаил Ломтадзеге тиесілі Blue Ocean Partners II Limited компаниясының меншігіне айналды. Футбол клубының мәлімдемесінде Ломтадзе мырза «Орталық Азиядағы жетекші технологиялық компания Kaspi.kz негізін қалаған технологиялық инвестор және кәсіпкер» ретінде сипатталған.

«Мен клубтың дамуына бағыт-бағдар беру және Уикомб Уондерерстің табысты болашағының бір бөлігі болу мүмкіндігіне өте ризамын»,- деді Михаил Ломтадзе.

Кәсіпкер ағылшын жанкүйерлеріне «Уикомб Уондерерстің» қаржылық тұрақтылығын қамтамасыз ететініне, команданың әлеуетін бағалауда заманауи технологиялар мен деректер талдауын енгізетініне, сондай-ақ клубтың өз академиясында жас ойыншыларды дайындауға күш салатынына уәде берді.

Wycombe Wanderers қазір бірінші лигада оныншы орында. Клуб ойыншыларының трансферлік нарықтағы жалпы құны, Transfermarkt мәліметі бойынша, 8 миллион 400 мың еуро болды.

Михаил Ломтадзе – Қазақстандағы ең бай бизнесмендердің бірі. Бірақ ол Грузия азаматы болғандықтан қазақстандық Forbes тізімінде жоқ.