Қызылорда тұрғыны ірі көлемдегі есірткімен ұсталды

Қызылорда қаласының 18 жастағы тұрғыны ірі мөлшерде синтетикалық есірткі затын өткізу мақсатында сақтағаны үшін ұсталды.

Бұл туралы Polisia.kz. хабарлады.

«Қызылорда қалалық ПБ ЖПҚБ патрульдік полиция батальоны қызметкерлері қала орталығында күдікті азаматты тоқтатып, тексеру барысында қолындағы сөмкесінен және қалтасынан 64 қара изолентамен оралған ақ түсті ерекше иісі бар ұнтақ заттарды анықтады. Сондай-ақ оның қала аумағында есірткі жасырған 30 нүктесі табылды» деп хабарлайды Polisia.kz.

Сараптама қорытындысымен тәркіленген ұнтақтың жалпы салмағы 148,79 грамм «а-пирролидиновалерофенен»  немесе «a-PVP»  психотроптық заттарға жататыны белгілі болды.

Күдікті уақытша ұстау изоляторына қамауға алынды. Тергеу жүргізіліп жатыр.