Квазимемлекеттік сектордағы монополияны азайтып, жеке бизнесті дамытатын түзетулер Мәжіліске жіберілді

Квазимемлекеттік секторды реттеуге бағытталған алтыншы монополияға қарсы түзетулер пакеті Мәжіліске енгізілді. Бұл туралы Премьер-Министр Олжас Бектенов мәлімдеді, деп хабарлайды Orda.kz.       

«Биылғы жылы Мәжіліске квазимемлекеттік сектордың жаңа жұмыс істеу шарттарына байланысты алтыншы монополияға қарсы түзетулер пакеті енгізілді. Бұл түзетулер аясында мемлекеттің 50%-дан аз үлесі бар заңды тұлғаларға және олармен байланысты тұлғаларға қатысу мерзімі айқындалды. Бұл мерзім жобаның өзін-өзі ақтау кезеңіне байланысты болады, бірақ 5 жылдан аспауы тиіс», – деді  Мәжіліс депутаттарының сауалына жауап берген Бектенов. 

Оның айтуынша, қазіргі заңнамада мемлекеттің квазимемлекеттік сектор субъектілеріне қатысу мерзімі мен жобаның өтелімділігіне қатысты шектеулер қарастырылмаған.

«Мемлекеттік қатысуы бар заңды тұлғаларды (әлеуметтік сала ұйымдарын қоспағанда) құру үшін монополияға қарсы органның келісімі 5 жыл мерзімге беріледі. Бұл мерзім бір рет қана осындай мерзімге ұзартылуы мүмкін. Егер ұзартудан бас тартылса, мемлекеттік қатысуы бар заңды тұлға жекешелендіру жоспарына енгізіледі. Бұл шаралар мемлекеттің кәсіпкерлік қызметке қатысуының нақты негіздерін реттеуге және жеке сектордың дамуына қолайлы жағдай жасауға мүмкіндік береді», – деп атап өтті Үкімет басшысы. 

Сонымен қатар, бәсекелестікті қорғау саласындағы заңбұзушылықтар мен әділетсіз бәсекеге қарсы бақылауды күшейту бойынша келесідей нормалар бар екенін айтты.

Бұл нормалар Кәсіпкерлік кодексте қарастырылған:

• әділ бәсекелестікті дамытуға жәрдемдесу;
• бәсекелестікті қорғау саласындағы заң бұзушылықтарды алдын алу, анықтау, тергеп-тексеру және тоқтату;
• экономикалық шоғырлануды реттеу;
• бәсекелестікті шектейтін нарық субъектілерін демонополизациялау.

Премьер-министрдің айтуынша, алтыншы түзетулер пакетінде сондай-ақ мынадай нормалар қарастырылған:

• энергетикалық көмірді энергия өндіруші ұйымдарға өткізу саласындағы әлеуметтік маңызы бар нарық субъектілеріне қатысты мемлекеттік баға реттеу енгізу;
• реттелетін қызметтермен технологиялық байланысты қызметтер көрсету – табиғи монополия субъектілерінің қызметтеріне қатысты;
• негізгі қуаттылық анықталған тауар нарықтарында кемінде үш жылда бір рет бәсекелестік жағдайын талдау;
• мемлекеттік монополиялар немесе арнайы құқық субъектілері шектеулерді бұзған жағдайда тергеу жүргізбей-ақ бұзушылықты және оның салдарын жою туралы нұсқама беру;
• монополияға қарсы органның келісімінсіз жасалған экономикалық шоғырлануды жарамсыз деп тану;
• мемлекеттен нарық субъектісіне мүлікті беру, радиожиілік ресурстарын ұсыну, жер қойнауын пайдалану құқығын немесе жер телімдерін беру – экономикалық шоғырлануға жатқызу.

«Айта кету керек, мемлекеттік сектор үлесін азайту және жеке бизнесті дамыту мәселелері Қазақстан Республикасы Үкіметінің тұрақты бақылауында тұр», – деп қорытындылады Олжас Бектенов. 

Бектенов сонымен қатар мемлекет қатысатын жүздеген компания мен нарық субъектілерін  оңтайландыру, жекешелендіру және акцияларын бастапқы жария түрде орналастыру туралы айтқан болатын. 

Қазақстанның премьер-министрі Олжас Бектеновтің айтуынша, бұрын құрылған ұлттық компаниялардың кейбір нарықтарда болуы қазіргі таңда орынсыз.