«Құпия қоңырау»: Премьер-министр Бектенов үкімет отырысы кезінде аяқ астынан шығып кетті

Үкімет отырысында премьер-министр Олжас Бектеновке біреу қоңырау шалды. Осылайша ол отырыстың басында «құпия» адам қоңырау шалғаннан кейін, аяқ астынан сыртқа шығып кетті, деп хабарлайды Orda.kz.

Бектенов Білім министрі қызметіне жаңадан тағайындалған Жұлдыз Сүлейменованы ант қабылдауға шақырды. Алайда оның анты кезінде премьерге біреу қоңырау шалып, ол кенеттен залдан шығып кетті.

Сүлейменова Қазақстан халқы мен президентіне адал болуға ант беріп жатқан сәтте, үкімет басшысының орны бос тұрды. Бұл жайттан соң министрлер сәл алаңдап қалды.

Аз үзілістен кейін үкімет отырысын бірінші вице-премьер Роман Скляр жалғастырды. Ол күн тәртібін ары қарай жүргізіп, сөзді Денсаулық сақтау министрі Ақмарал Әлназароваға берді.

Премьердің шұғыл кету себебі әзірге белгісіз. Үкімет басшысын жұмыс орнынан тікелей шақырта алатын адамдардың аз екенін ескерсек, сарапшылар қоңырау Мемлекет басшысы Қасым-Жомарт Тоқаевтан түскен болуы мүмкін деп болжайды. Бұл ретте қандай мәселе бойынша жедел араласу қажет болғаны да қызығушылық тудырып отыр.

Денсаулық сақтау министрі Ақмарал Әлназарова сөз сөйлеп жатқан кезде премьер-министр қайта оралды.