Қосшыда әкімнің орынбасары прокурор талаптарын орындамағаны үшін жазаланды

Ақмола облысы Қосшы қаласында әкімнің орынбасары бюджеттік заңнаманы бұзғаны, прокурордың ұсынымына уақтылы жауап бермегені және прокурорды оның қаралатын уақыты мен орны туралы хабарламағаны үшін жазаланды. 

Оған Әкімшілік кодекстің екі бабы бойынша 370 000 теңгеден астам айыппұл салынды.

"Прокуратура туралы" Конституциялық заң талаптарына сәйкес, прокурорлық қадағалау және ден қою актілері олар жіберілген органдардың, ұйымдардың және лауазымды адамдардың қарауы, орындауы үшін міндетті.

Лауазымды тұлғаның прокурордың ұсынуын қараусыз қалдыруы не онда көрсетілген заң бұзушылықтарды жою бойынша шаралар қабылдамауы, сонымен қатар уақтылы жауап бермеуі (ӘҚБтК-нің 664-бабы), 8 АЕК мөлшерінде айыппұл түріндегі әкімшілік жазаға әкеп соғады.

Сондай-ақ прокурорды қарау нәтижелері мен қабылданған шаралар туралы хабарламауы немесе уақтылы хабарламауы (ӘҚБтК-нің 666-бабы) 200 АЕК-ке дейін мөлшерінде айыппұл түріндегі әкімшілік жазаға әкеп соғады.

Егер прокурорлық қадағалау актілерін орындамау азаматтардың немесе ұйымдардың құқықтары мен заңды мүдделеріне не қоғамның немесе мемлекеттің заңмен қорғалатын мүдделеріне елеулі зиян келтіруге әкеп соқса, онда бұл Қылмыстық кодекстің 381-бабы бойынша қудаланады.

Осыған ұқсас бұзушылық бойынша ЖАО тағы екі лауазымды тұлға жауапқа тартылды.