Көлікті құрбысы басқарған: Шавкат Рахмоновтың жұбайы жол апатына қатысты түсініктеме берді

Жамбыл облысы Мойынқұм ауданындағы тасжолда Шавкат Рахмоновтың жұбайы қатысқан жол апатынан екі адам қаза тапқан еді. Қазіргі таңда қылмыстық іс қозғалып, спортшының жұбайы куәгер ретінде танылып отыр, деп хабарлайды Orda.kz.

Гүлайым Рахмонова ұлымен және екі құрбысымен бірге Қарағандыдан Алматыға жол тартқан. Ол тізгіндеген Toyota Land Cruiser Алматы – Екатеринбург бағытындағы жолдың 296-шақырымында, Ақсуйек ауылының маңында аударылып кеткен. Алдын ала мәлімет бойынша, жүргізуші көлік тізгініне ие бола алмаған.

Апат салдарынан 39 жастағы З.А. оқиға орнында қаза тапты. 35 жастағы тағы бір жолаушы — А.С. — Мойынқұм аудандық ауруханасына бара жатқан жолда көз жұмды. Гүлайым Рахмонова мен 2022 жылы туған ұлы Шу қалалық ауруханасына жеткізіліп, травматология бөліміне жатқызылды. Дәрігерлердің айтуынша, олардың жағдайы — орташа ауырлықта.

«Ота қажет емес. Пациенттер динамикалық бақылауда», — деді аурухана өкілдері.

Жол-көлік оқиғасы фактісі бойынша барлық қажетті процессуалдық шаралар жүргізіліп жатыр. Полиция департаментінің мәліметінше, оқиғаның мән-жайын анықтауға бағытталған сараптамалар тағайындалған.

«Қазіргі уақытта сіз атап өткен азаматша қорғау құқығы бар куә ретінде сұралды. Ол Алматы қаласындағы ауруханада ем қабылдап жатыр. Тергеу нәтижелері бойынша оған қатысты процессуалдық шешім қолданыстағы заңнама аясында қабылданады»,  деп мәлімдеді полиция департаменті.

Гүлайым Рахмонова өз түсініктемесінде көлікті өзі емес, қаза тапқан құрбыларының бірі басқарғанын айтқан. Оның сөзінше, жолда шаршауына байланысты көлік тізгініне құрбысын отырғызған.