Көкшетауға неліктен қатаң сөгіс алған шенеунік әкім болып тағайындалды?

Ақмола облысының әкімі Марат Ахметжанов брифингте Әнуар Күмпекеевтің Көкшетау әкімі қызметіне тағайындалу себебін түсіндірді, деп хабарлайды Orda.kz.

Еске салсақ, Күмпекеев бюджет қаражатын тиімсіз жұмсағаны үшін қатаң сөгіс алған болатын. 2018 жылы Павлодар қаласының әкімі қызметін атқарған кезде ол қызметтік пәтерді 49 миллион теңгеге сатып алғаны үшін жазаланған. Ал 2019 жылы ол 6 миллион теңге тұратын жиһаз сатып алғаны үшін қатаң сөгіс алды. Сол кездегі Павлодар облысының әкімі Болат Бақауовтың сынына ұшыраған еді.

Соған қарамастан, Марат Ахметжанов Күмпекеевтің қызметке тағайындалуына ешқандай құқықтық кедергілер жоқ екенін мәлімдеді.

«Ол барлық инстанциялардан келісімнен өтті. Тағайындау кезінде оның білімі мен кәсіби тәжірибесі ескерілді. Ол тұрғын үй-коммуналдық шаруашылығын жақсы біледі. Степногорск қаласында жеті жыл жұмыс істеген, соның төрт жылында қала әкімі болған»,
— деп атап өтті Ахметжанов. 

Әкімнің айтуынша, тағайындау өңірдегі ірі жобалардың, соның ішінде ЖЭО және басқа да инженерлік нысандар құрылысының басталуына байланысты. Сондай-ақ, үміткердің кәсіби қабілеттері ғана емес, қала алдында тұрған міндеттерді шешуге дайындығы да ескерілген.

Брифингте Ақмола облысының әкімі Марат Ахметжанов Қазақстан мен Ресей үкіметтері арасында Қазақстанның үш қаласында көмір электр станцияларын салу туралы келісімнің егжей-тегжейін  айтып берді.

Еске салайық, электр станцияларын ресейлік «Интер РАО» компаниялар тобы салатын болады. Марат Ахметжановтың айтуынша, жобаны іске асырудың белсенді кезеңі 2025 жылдың жазында басталады.