Қазақстандық блогерлер отыз күн ішінде мемлекетке 53 млрд теңге төлеуі керек

Қазақстандық 600-ге жуық  блогерлер кірістерін төмендеткендіктен 53,3 миллиард теңге көлеміндегі сәйкессіздіктер анықталды, деп хабарлайды Orda.kz.

Мемлекеттік кірістер комитетінің мәліметінше,  салықтық есептілігінде айтарлықтай сәйкессіздіктер анықталған. Нақтырақ айтсақ, 594 адам кірістің жалпы қаражатын 53,3 миллиард теңгеге төмендеткен.  

«Бақылау шараларын жүргізу барысында мемлекеттік кірістер органдары түрлі дереккөздерден алынған мәліметтерді салық декларацияларындағы ақпаратпен салыстыру нәтижесінде 594 адамға қатысты  53,3 миллиард теңге көлемінде сәйкессіздік анықталды. Осыған байланысты, 13-14 ақпан аралығында «кірісті төмендету» заңбұзушылығы бойынша хабарламалар жіберілді», деп мәлімдеді ведомство.

Комитеттің айтуынша, блогерлер бұл хабарламаны орындау үшін қосымша салықтық есептілік тапсырып, салықты дербес есептеп төлейді. Егер салық төлеуші келіспесе, түсіндірме ұсынуы тиіс. Осының барлығы отыз күннің ішінде орындауы қажет.