Қазақстандық банк арқылы 7 трлн теңге шетел асып кеткен

Бұл туралы президент Қасым-Жомарт Тоқаев Қаржылық мониторинг агенттігімен болған жиында мәлімдеді, деп хабарлайды Orda.kz

Президенттің айтуынша, 2025 жылы көршілес елдердің бірінен Қазақстандағы банктердің бірі арқылы 7 триллион теңгеден астам қаражат басқа мемлекеттерге шығарылған.

«Заң, экономика, тіпті саясат тұрғысынан алғанда, бұл – менің ойымша, өрескел қателік. Өкінішке қарай, алаяқтық қаржылық схемаларға қатысты мұндай фактілердің қарасы көп», – деді Тоқаев Қаржылық мониторинг агенттігіндегі кеңесте.

Президент Қаржы нарығын реттеу және дамыту агенттігіне Ұлттық банкпен бірлесіп, коммерциялық банктердің қызметіне бақылауды күшейтуді тапсырды.

Еске сала кетейік, Конституциялық Сот төрағасының орынбасары Бақыт Нұрмұханов реформаның біріктірілген жобасын ұсынды. Оның айтуынша, бұл өзгеріс Конституцияның 84% пайызын құрайды.