Қарағандыда он жыл бойы мүгедек адамды қайыр сұрауға мәжбүрлеген топ сотталды

Қарағандыда сот он жылға жуық мүгедек ер адамды қайыр сұрауға мәжбүрлеп, тапқан ақшасын тартып алып отырған қылмыстық топтың төрт мүшесіне үкім шығарды, деп хабарлайды Orda.kz.

Сот мәліметінше, қылмыстық топ 2015 жылдан бастап қол-аяғы жоқ ер адамды күн сайын қала орталығына отырғызып, қайыр сұратқан. Жұбайы ер адамға қозғалуға көмектескен. Ер адам күніне 20-40 мың теңге тауып, бар ақшаны «қожайындары» тартып алып отырған.

2020 жылы ерлі-зайыптылардың қыздары дүниеге келген. Топ басшысының бұйрығымен сәби ата-анасынан ажыратылып, оның әпкесіне тәрбиелеуге берілген. Бала ата-анасына тек рұқсатпен көрсетілген. Сонымен қатар, олардан туу туралы куәлікті тартып алып, ата-ана құқығынан айыратындарын айтып қорқытқан.

Топ басшысы 17 жылға бас бостандығынан айырылды. Ал оның үш сыбайласы — 12 жылға сотталды. Олардың арасында басты айыпталушының жиені, жиенінің күйеуі және олардың танысы бар. 2023 жылы ұсталғаннан кейін де топ басшысы тергеу изоляторынан телефонмен қылмыстық топты басқаруды жалғастырғаны белгілі болды. Оның сыбайластары мүгедек ер адамды қайыр сұратуға шығарып, жиналған ақшаны өз қажеттіліктеріне және автонесие төлеуге жұмсап отырған.

Сотта жәбірленушілердің, куәгерлердің айғақтары және сараптамалық қорытындылар күдіктілердің кінәсін дәлелдеді. Жәбірленуші әйелге моральдық зиян ретінде сегіз миллион теңге өтемақы тағайындалды.

Үкім әлі заңды күшіне енген жоқ.