«Яндекс тамақ» және тағы басқа қызметтерден тарайды: Мәдиев хакерлік шабуыл туралы айтты

Цифрлық даму министрі Жасұлан Мәдиев 16 млн қазақстандықтың дерегінің таралуы бойынша жауап берді, деп хабарлайды Orda.kz.

Жасұлан Мәдиевтің сөзінше, 16 млн қазақстандықтың дерегі көбіне «Яндекс тамақ» және басқа ресейлік қызметтерден тарайды.

«Мәселен «Яндекс тамақ» қызметін алайық. Оның Қазақстандағы штаты үлкен. Жеке деректерді қорғауға келетін болсақ, олар да бағынады. Олар үшін деректерді қорғауда қандай да бір ерекшелік  жоқ. Ал ірі дербес дерек иелері хакерлік шабуылға жиі ұшырайды», – деді цифрлық даму министрі Жасұлан Мәдиев. 

Министрдің айтуынша, осы жағдайдан кейін қазір бір миллионнан астам азаматтың деректерін өңдейтін операторларға арналған міндетті киберсақтандыруды енгізгелі жатыр. Сондай-ақ, медициналық ақпараттық жүйелерді аса маңызды инфрақұрылым нысаны етуді жоспарлап отыр. Бұл қауіпсіздік шараларын күшейтеді. Сөз соңында министр ресейлік қызметтерге наразылығының жоқ екенін мәлімдеді.

Еске сала кетейік, 15,8 миллион ЖСН, 17 миллион телефон нөмірі, мекенжай мен өзге де қазақстандықтардың жеке деректері ғаламторға ашық шығып кеткен еді.