Израиль әскері Газа секторының миллионнан астам тұрғынын эвакуациялауға 24 сағат берді

Израиль қорғаныс күштерінің (ЦАХАЛ) қолбасшылығы жұма күні Газа қаласы мен солтүстік Палестина анклавының «барлық бейбіт тұрғындарына» «өз қауіпсіздігі мен қорғанысы үшін» жердегі операция басталар алдында 24 сағат ішінде үйлерін тастап, оңтүстікке эвакуациялауды бұйырды, деп хабарлайды Orda.kz. Euronews сайтына сілтеме жасап.

Бұл  1,1 миллион адамды эвакуациялау туралы болып отыр. БҰҰ Бас хатшысының баспасөз хатшысы Стефан Дюжаррик мұндай ауқымды эвакуациялау «жойқын гуманитарлық салдарларсыз мүмкін емес» екенін айтып, Израильді бұйрықтан бас тартуға шақырды.

https://www.youtube.com/watch?v=HDocYOz6-Zw&t=15s

Еуропалық Одақтың дипломатия басшысы Жозеп Боррел де Израиль билігінің Газа секторының бір миллионнан астам тұрғынын бір күнде эвакуациялау талабының шындыққа жанаспайтынын айтты.

Жұма күні АҚШ Мемлекеттік хатшысы Антони Блинкенді қабылдаған Иордания королі II Абдалла «палестиналықтарды барлық жерлерінен ығыстырып шығару немесе олардың қоныс аударуын тудыратын кез келген әрекетке» қарсы ескерту жасап, қазіргі босқындар мәселесі «көрші елдерге таралып, одан әрі шиеленісіп кетпеуі керек» деді. 

ХАМАС өз кезегінде газалықтарды «Израильдің үгіт-насихатына құлақ аспауға және эвакуация шақыруларына көнбеуге» шақырды. Топ өкілдерінің мәлімдеуінше, «Израильдің секторға жасаған соққылары нәтижесінде кепілге алынған 13 адам, соның ішінде шетелдіктер қаза тапты».

7 қазанда Хамастың қанды шабуылымен соғыс басталғаннан бері Израильде 1200-дей адам қаза тапты. Газа секторында Израильдің жаппай жауап соққылары нәтижесінде, жергілікті биліктің мәліметінше, 1417 адам қаза тапқан.

Бұған дейін Израиль Газа секторымен шекараға әскерлерін, танктерін және басқа да әскери техникасын көшірген болатын. Израиль армиясының басшылығы ХАМАС-қа қарсы кең ауқымды шабуыл операциясына дайын екенін мәлімдеді.

«Газа бұдан былай бұрынғыдай болмайды. Газаны басқарғандар ауыр соққы алады. Біз оларды жойамыз. Ал сонда қалғандар Израильге мұны істеу мүмкін емес екенін анық түсінеді", - деді Израиль Бас штабының басшысы Герци Халеви.