«Хирургты жансақтау бөліміне түсірген науқас»: Денсаулық сақтау министрі қазақстандықтарға үндеу жасады

Қостанайдағы дәрігердің соққыға жығылуына байланысты Денсаулық сақтау министрі Ақмарал Әлназарова мәлімдеме жасады, деп хабарлайды Orda.kz.

Министр қазақстандықтардан медицина қызметкерлеріне қарсы зорлық-зомбылық жасауды тоқтатуды сұрады.

«Құрметті қазақстандықтар, сіздерге медбике қызметінен министрге дейінгі жолдан өткен адам ретінде жүгінемін. Медицина қызметкерлеріне қарсы зорлық-зомбылықты тоқтатыңыздар! Бұл жай ғана агрессия емес. Бұл —  қылмыс», — деді министр.

Сондай-ақ, Әлназарова қыркүйек айында парламентке медицина қызметкерлеріне жасалған қылмыстарға тағайындалатын жауапкершілікті қатаңдату туралы заң жобалары енгізілетінін айтты. 

Ол бейбіт күнде дәрігердің өміріне қауіп төнуі ақылға сыймайтын жағдай екенін атап өтті. Мұндай әрекеттерді тұрмыстық дау ретінде емес, қоғамдық қауіпсіздікке төнген қатер ретінде қарау керегін ескертті.

Айта кетейік, бұған дейін Қостанайда науқас хирургті соққыға жығып, жансақтау бөліміне түсірді.