Халықаралық Олимпиада комитетін алғаш рет әйел адам басқарады

Зимбабведен келген Кирсти Ковентри Халықаралық Олимпиада комитетінің жаңа басшысы болып сайланды. Оның кандидатурасын ХОК басшысы Томас Бах қолдады. Бұл туралы ұйымның баспасөз қызметі мәлімдеді, деп хабарлайды Orda.kz тілшісі.

Жүзуден екі дүркін олимпиада чемпионы, Зимбабвенің Спорт, демалыс, өнер және мәдениет министрі Кирсти Ковентри Халықаралық Олимпиада комитетінің (ХОК) жаңа президенті болып сайланды.

Бұл шешім 20 наурыз, бейсенбі күні Грекияда өткен ХОК-тың 144-сессиясында қабылданды.

41 жастағы Ковентри ХОК-ты басқарған алғашқы әйел әрі африкалық. Ол бірінші турда 97 дауыстың 49-ын алды, кейбір БАҚ оны «таңқаларлық» деп атады. Бұл қызметке барлығы жеті адам өтініш білдірген.

Дауыс беру хаттамасы ХОК сайтында жарияланған.

«Көп жылдар бұрын Зимбабведе алғаш жүзе бастаған жас қыз ретінде мен мұндай сәтті тіпті армандамағанмын да. Мен ХОК-тың алғашқы әйел президенті, сонымен қатар Африкадан шыққан бірінші әйел болғанымды ерекше мақтан тұтамын. Бұл дауыс көптеген адамдарға шабыт береді деп сенемін. Бүгін мен үлгі болуға тиісті өз жауапкершілігімді толық түсінемін», - деді ХОК-нің жаңа сайланған президенті.

Бұған дейін ХОК-ны 12 жыл бойы неміс Томас Бах басқарды. Ол 23 маусымда зейнеткерлікке шығады.

Президентті ХОК мүшелері жасырын дауыс беру арқылы сегіз жыл мерзімге сайлайды.