Ерлан Тұрғымбаев екі айға қамауға алынды

30 сәуірде Астананың мамандандырылған тергеу соты бұрынғы ішкі істер министрі Ерлан Тұрғымбаевқа қатысты екі ай мерзімге қамауға алу түріндегі бұлтартпау шарасын санкциялады.

Бұл туралы Бас прокуратураның баспасөз қызметі хабарлады.

Ерлан Тұрғымбаев қаңтар оқиғасына қатысты 29 сәуірде ұсталған болатын. Ол ауыр зардаптарға әкеп соққан билікті және қызметтік өкілеттіктерді асыра пайдаланды (ҚК 362-бабының 4-бөлігі) деген күдікке ілінді.

Наурызда Қазақстанның Бас прокуратурасы бұрынғы ішкі істер министрі Ерлан Тұрғымбаевтың қаңтар оқиғасы кезіндегі құқық тәртібі мен қауіпсіздікті қамтамасыз етпегені, сондай-ақ құқық қорғау органдары қызметкерлеріне қатысты жүргізіліп жатқан тергеу шаралары аясында жауап алғанын хабарлады.  Бұл ретте бұрынғы ІІМ басшысының куәгер немесе күдікті болғаны айтылмады.

Ерлан Тұрғымбаев құқық қорғау органдарында 1984 жылдан бері қызмет атқарған. Ол 2019 жылы Ішкі істер министрі болып, үш рет қайта тағайындалды. Оған дейін Алматы қалалық ішкі істер департаментін басқарған. 2022 жылдың ақпанында ол Ішкі істер министрі қызметінен босатылып, Қазақстан Президентінің кеңесшісі болып тағайындалды. Сол жылдың тамыз айында Ерлан Тұрғымбаев бұл қызметтен босатылды.