Елімізде коллекторларға проблемалық несиелерді сатуға мораторий енгізіледі

Қазақстанда банктер мен микроқаржы ұйымдарының өндіріп алушыларға проблемалық несиелерді сатуына екі жылдық мораторий енгізу жоспарлануда. Тиісті заң жобасын Мәжіліс депутаттары бірінші оқылымда қабылдады, деп хабарлайды Orda.kz.

Шектеу екі жыл бойы күшінде болады.

«Екі жылға, яғни 2026 жылдың 1 қаңтарына дейін мораторий енгізіледі. Мораторий уақытында - коллекторларға проблемалық тұтынушылық несиелерді сатуға толық тыйым салынады. Сондай-ақ жаңа талап енгізілуде, егер қарызды төлемеу уақыты 90 мерзімі өткен болса, онда мұндай несие бойынша банктер мен микроқаржы ұйымдары (МҚҰ) 24 ай бойына коллекторлық агенттіктерге несиелер бойынша мәліметтерді беруге немесе сатуға құқылы емес», - деді Мәжіліс отырысында ҚР Қаржы нарығын реттеу және дамыту агенттігінің төрағасы Мәдина Әбілқасымова.

Естеріңізге сала кетейік, бұған дейін депутат Үнзила Шапақ халықтың қарыз жүктемесінің деңгейі туралы мәліметтерді ұсынған болатын. Мәселен, 2024 жылдың 1 қаңтарындағы жағдай бойынша 8,5 миллион қазақстандықтың қаржы ұйымдары алдында 19 триллион теңге қарызы бар.

Оның ішінде 8,2 миллион азаматтың 10 триллион теңге көлеміндегі кепілсіз тұтынушылық несиелер бойынша берешегі бар. 1,6 миллион азаматтың 1,7 триллион теңге проблемалық несиесенің мерзімі 90 күннен асып кеткен.