Елімізде егіс науқаны аяқталды: АШМ қорытындысын жариялады

Ауыл шаруашылығы дақылдары 23,7 миллион гектар алқапқа себілген, деп хабарлайды Orda.kz.       

Қазақстан Республикасының Ауыл шаруашылығы министрлігі егіс науқанының аяқталғанын мәлімдеді. Алдын ала деректерге сәйкес, ауыл шаруашылығы дақылдары 23,7 млн гектар жерге егілген. Биыл жоғары табысты және сұранысқа ие дақылдар алқаптары ұлғайтылды:

 • Майлы дақылдар – 3,4 млн гектар (өткен жылмен салыстырғанда 0,5 млн гектарға көп);

 • Малға азықтық дақылдар – 3,3 млн гектар (114 мың гектарға артық);

 • Жүгері – 167,5 мың гектар;

 • Көкөніс-бақша дақылдары – 222,3 мың гектар.

Министрлік бұл көлем ішкі қажеттілікті ғана емес, сонымен қатар экспорттық әлеуетті арттыруға мүмкіндік береді деп санайды.

«Биыл егіс науқанын қаржыландыру алғаш рет дала жұмыстары басталмай тұрып, алты ай бұрын басталды. Жалпы қаржыландыру көлемі 700 млрд теңгеге жетті. Диқандарды жеңілдікпен қаржыландыруға қолжетімділігін кеңейту үшін 85%-ға дейінгі қарыз қаражатына кепілдік беру тетігі енгізілді» деп жазылған министрлік мәліметінде. 

Ауыл шаруашылығы техникасын жеңілдікпен лизингке беру көлемі 250 млрд теңге болды.