«Даттың» бұрынғы бас редакторы Нұртаза Қадырниязовты полиция үйінен ұстап әкетті

Алматыда философия ғылымдарының кандидаты Нұртаза Қадырниязовты полиция үйінен ұстап әкетті, деп хабарлайды Orda.kz.

Бұл туралы ақпаратты белсенді Абзал Достияр өзінің Facebook парақшасында хабарлады. Оның айтуынша, Қадырниязов өзі хабарласқан сәтте үстінен біреудің арыз түсіргенін ғана айтып үлгерген.

Ғалым жуырда Қойшыбек Мүбарак атты журналистке берген сұхбатында Қытаймен визасыз режимді, елге кірген қытай азаматтарының санын және жер мәселесін көтерген. 

«Визалық режим жойылғаннан бері 928 мың қытай азаматы елге кірді. Билік бейқам отырса, салдары ауыр болуы мүмкін. Жер мәселесіне қатысты президент Тоқаев халық алдына шығып жауап беруі керек», — деген еді.

Қадырниязов соңғы жылдары қытайлық азаматтарға ірі жер телімдері беріліп жатыр деп дабыл қағып жүрген белсенділердің бірі.

Қазір ғалымды бір топ полиция қызметкері Әуезов аудандық полиция басқармасына алып кеткені белгілі.