Бұрынғы қорғаныс министрі Руслан Жақсылықов ұсталғаны туралы ақпарат тарады

Бұрынғы қорғаныс министрі Руслан Жақсылықов Астана қаласының уақытша ұстау изоляторына жеткізілгені туралы ақпарат тарады, деп хабарлайды Orda.kz. 

Бұл туралы Ulysmedia telegram-арнасы хабарлады.

2025 жылғы 10 маусымда бұрынғы қорғаныс министрі, генерал-полковник Руслан Жақсылықов қамауға алынып, Астана қаласының уақытша ұстау изоляторына жеткізілді. 

Elmedia дереккөздерінің айтуынша, министрді ҰҚК ұстады. 

«Біздіңше, бұл қаржы жымқыруға қатысты болуы мүмкін», – деп нақтылады дереккөз.

NEGE дереккөздерінің хабарлауынша, тінту шаралары таңертең өткен, қазір экс-министр үйінде.

Бұрынғы қорғаныс министрі Руслан Жақсылықовтың өзі ұсталғаны туралы ақпарат шындыққа жанаспайтыны туралы Tengrinews тілшісіне айтты.

Ең қызығы, бұрынғы қорғаныс министрін ұстау туралы жаңалық Бас прокурордың жазбасымен тұспа-тұс келді.

Берік Асылов Бас әскери прокуратураға Қарулы Күштермен, басқа да әскерлермен және әскери құралымдармен бірлесіп «Әскердегі Заң және тәртіп» және «Цифрлық профилактика» атты екі жаңа жобаны енгізуді тапсырғанын жазды.

Еске сала кетейік, 6 маусым күні Қасым-Жомарт Тоқаев Руслан Жақсылықовты Қорғаныс министрі қызметінен алып тастаған еді.