Бұрын құрылған ұлттық компаниялардың кейбір нарыққа қатысуы енді орынсыз – Бектенов

Қазақстанның премьер-министрі Олжас Бектеновтің айтуынша, бұрын құрылған ұлттық компаниялардың кейбір нарықтарда болуы қазіргі таңда орынсыз.

«Бүгінде мемлекеттің кәсіпкерлік қызметке қатысуының бес негізі бар, олар ел экономикасын дамыту, оның бәсекеге қабілеттілігін арттыру, ұлттық қауіпсіздікті қамтамасыз ету және азаматтардың әлеуметтік кепілдіктерін қамтамасыз етуге қатысты.
Мемлекет мынадай жағдайларда кәсіпкерлік қызметке қатысады:
1.      Ұлттық қауіпсіздікті, мемлекеттің қорғаныс қабілетін қамтамасыз етудің немесе қоғам мүддесін қорғаудың басқа мүмкіндігі болмаған кезде;
2.      Мемлекеттік стратегиялық нысандарды пайдалану және ұстау кезінде;
3.      Мемлекеттік монополия аясындағы қызметті жүзеге асырғанда;
4.      Бәсекелестіктің жоқтығы немесе төмен деңгейде дамыған кезінде;
5.      Бұрын құрылған мемлекеттік кәсіпорындармен, жарғылық капиталындағы үлесінің 50%-дан астамы мемлекетке тиесілі заңды тұлғалармен және оларға қатысы бар тұлғалармен қызметті жүзеге асырған кезде.
Сонымен қатар кейбір тауар нарықтарында жеке кәсіпкерлік субъектілері пайда болуда, сәйкесінше, бұрын құрылған кәсіпорындар арқылы мемлекеттің экономикадағы одан әрі қатысуы енді орынсыз көрінеді», – деді Бектенов мәжіліс депутаттарының сауалына жауап бере отырып. 

Оның айтуынша, осыған байланысты Бәсекелестікті қорғау және дамыту агенттігі мүдделі мемлекеттік органдармен және ұйымдармен бірлесіп, аталған негіздерді қайта қарау жұмысын жүргізген.

 Нәтижесінде, 192-баптың 1-тармағы 5) тармақшаны алып тастау және осы бапты келесі мазмұндағы 1-1 тармақпен толықтыру ұсынылған:

«1-1. Мемлекеттік кәсіпорындар, жарғылық капиталындағы қатысу үлесінің 50%-дан астамы мемлекетке тиесілі заңды тұлғалар және оларға қатысы бар тұлғалар, оның ішінде 1-баптың 1-тармағының 1)–4) тармақшаларында көрсетілген негіздер бойынша қызмет жүргізетіндер, осы баптың 1-тармағында көрсетілген қызмет түрлері тізбесі негізінде кәсіпкерлік қызметті жүзеге асырады».

«Аталған түзетулер «Қазақстан Республикасының астанасы мен республикалық маңызы бар қалаларды дамыту, ұлттық жобалар, кәсіпкерлік және мемлекеттік органдардың функцияларын оңтайландыру мәселелері бойынша кейбір заңнамалық актілерге өзгерістер мен толықтырулар енгізу туралы» заң жобасы аясында қарастырылуда (қазір Сенаттың қарауында). Бұл заңнамалық өзгерістер мемлекеттің экономикадағы үлесін едәуір азайтуға мүмкіндік береді, бұл өз кезегінде жеке кәсіпкерлікті, бәсекелестікті және жалпы ел экономикасын дамыту үшін қолайлы жағдай жасауға ықпал етеді», – деп түсіндірді премьер-министр. 

Министрлер кабинетінің басшысы атап өткендей, мемлекет пен кәсіпкерлік субъектілерінің өзара іс-қимылындағы негізгі қағидалардың бірі – мемлекеттің кәсіпкерлікке шектеулі түрде қатысуы.

«Мемлекеттің кәсіпкерлік қызметке қатысуының шарттары мен рәсімдері Кәсіпкерлік кодексте айқындалған», – деді Бектенов.