БҚО Ұялы ауылына ұшқышсыз ұшатын дрон құлады  

18 ақпанда Бөкейорда ауданына қарасты Ұялы ауылының шетінде құлаған ұшқышсыз ұшу аппараты табылды, деп хабарлайды Orda.kz.

 «Мой город» мәліметінше, оқиға орнынан түсірілген фотосуреттерді жергілікті тұрғындар бөлісіпті. Кейінірек, ақпаратты аудан әкімі Нұрлыбек Даумов растады.  

Ұшу аппаратының ұзындығы – 120 см. Оқиға орнына полиция мен құтқарушылар келіп, тексеру жұмыстарын жүргізді.  Бұл құрылғы француздық «Sagem» компаниясы әзірлеген «Crecerelle» барлау дронына өте ұқсас.  

Қазір дрон Қазақстан әскери күштеріне тапсырылды, ол облыс орталығы – Орал қаласына жеткізілді.  Біз бұл жағдайға қатысты пікір алу үшін БҚО полиция департаментіне жүгіндік.  

«БҚО Бөкейорда ауданы Ұялы ауылы маңынан ұшқышсыз ұшу аппаратына ұқсас заттың табылуына байланысты полиция департаменті уәкілетті органдармен бірлесіп тексеру жүргізіп жатыр», деп хабарлады баспасөз қызметі.  

Айта кетейік, Бөкейорда ауданында Ресей Федерациясына тиесілі «Капустин Яр» әскери полигоны орналасқан. Өткен жылдың қазан айында Ресей әскери техникасы осы полигонға барар жолдағы Сайхын ауылында газ құбырын зақымдаған болатын.  

Өңір әкімдігі сол кезде Қазақстан мен Ресей арасындағы келісімге сәйкес, РФ қарулы күштерінің әскери техникасы Қазақстан аумағы арқылы өтуге құқылы екенін түсіндірген еді.