БҚО-да мемлекеттік кірістер департаментінің басшысы ұсталды

Батыс Қазақстан облысы бойынша Мемлекеттік кірістер департаментінің экспорттық бақылау бөлімінің басшысына қатысты қылмыстық тергеу басталды, деп хабарлайды Orda.kz.

«Орал апталығы» басылымының мәліметінше, осы бөлімнің басшысы болған Дамир Рахымбаевқа қылмыстық іске қатысы бар деген күдік тағылып отыр. Қазір оған қатысты сотқа дейінгі тергеу жүріп жатыр.

«Дереккөздер қараша айының басында Рахымбаев Астанаға іссапармен барған кезде ұсталып, қамауға алынғанын айтады. Кей ақпарат бойынша, оны ұстау барысында шамамен жүз миллион теңгеге жуық ақша табылған. Тергеу пара алған болуы мүмкін деп болжап отыр» деп жазды «Орал апталығы» басылымы. 

Дамир Рахымбаев көп жыл бойы БҚО-дағы Мемлекеттік кірістер департаментінің экспорттық бақылау бөлімін басқарған. Қазақстан мен Ресей шекарасы арқылы жүк тасымалымен айналысатын кей кәсіпкерлер Рахымбаевты белгілі бизнесмен Гаджиевпен байланыстырады.