Бізде ақша тым көп, содан инфляция болады – Сүлейменов

Қазақстандағы инфляцияның өсуіне елдегі ақша көлемінің шамадан тыс артуы себеп болып отыр. Бұл туралы ұлттық банк төрағасы Тимур Сүлейменов мәлімдеді, деп хабарлайды Orda.kz.

Мәжіліс дәлізінде сұраққа жауап берген Тимур Сүлейменовтің айтуынша, ел экономикасына тым көп қаражат құйылып жатыр.

«Инфляция көбіне бізде ақша тым көп болғандықтан туындайды. Монетарлық агрегаттар шамамен 18 пайызға өсті. Бұған дейін аздап төмендеу болғаны байқалған. Алайда қазір қайтадан өсіп келеді. Экономикаға өте көп ақша құйылуда. Оның екі негізгі көзі бар — ауқымды фискалдық шығындар мен белсенді тұтынушылық несиелендіру», — деді Сүлейменов.

Елде сұраныс тауар мен қызметтен тез өсті. Сұраныс көп болса, ал ұсыныс аз болса, баға шарықтап, инфляция пайда болады. Тапшылықты импортпен жабуға тырысқанда доллар бағасы көтеріледі. Сондықтан адамдардың ақша шашуға деген ынтасын басу үшін негізгі мөлшерлеме 18%-ға дейін көтерілді. Ұлттық банк айналымдағы ақша көлемін шектеуді көздеп отыр.