Баганашылдағы жанжал ұмытылды ма?: Бұрынғы шенеунік қайтадан басшылық қызметке келді

Баганашылдағы балалар үйінің тәрбиеленушілерін қала сыртына көшіру бастамасынан кейін қызметінен кеткен Алматы облыстық білім басқармасының бұрынғы басшысы Салтанат Беспаева қайтадан жаңа лауазымға тағайындалды, деп хабарлайды Orda.kz.

Алматы облысында Тілдерді дамыту басқармасының басшысы ауысты. Бұл қызметке облыстық білім басқармасының бұрынғы басшысы Салтанат Беспаева келді.

Айта кетейік, 2024 жылдың тамыз айында ол Баганашылдағы балалар үйінің тәрбиеленушілерін көшіру оқиғасынан кейін қызметінен босатылған еді.

Еске салайық, балалар үйін Алматыдан Қонаев қаласына көшіру жоспары іске аспай қалған болатын. Алайда бұған дейін ондай қадам болмайды деп уәде берілген. Балалар қала сыртына көшуге қарсы шыққан соң полиция араласқан.

Нәтижесінде бұл іске президент Қасым-Жомарт Тоқаев араласып, көшіруді тоқтатуды және балалар үйін Алматыда қалдыруды тапсырған болатын.