Атырау облысында Жайық өзеніндегі су деңгейі көтерілуде

Атырау облысында Жайық өзеніндегі  су әлі де көтерілуде, деп хабарлайды облыстық төтенше жағдайлармен күрес штабы.

«Қазгидромет РМК-ның гидрологиялық мониторингінің мәліметтері бойынша Атырау облысы бойынша 2024 жылғы 28 сәуірде сағат 8.00-дегі жағдай бойынша соңғы тәулікте Атырау облысының Жайық өзенінің бойында судың келуіне байланысты Атырау облысы аумағындағы су деңгейі соңғы тәулікте өзгерді» делінген хабарламада.

Жолданған ақпаратқа сәйкес:

•Жайық өзені – Индер ауылының өлшеу стансасында деңгей 645 см, көтерілу +19 см, тасқын басынан бері жалпы көтерілу 422 см;

•Жайық өзені – Махамбет кентіндегі өлшеу стансасында деңгей 743 см, су деңгейінің көтерілуі тәулігіне +8 см, тасқын басынан бері жалпы көтерілу 426 см;

•Атырау қаласы Жайық өзенінің өлшеу стансасында деңгей 434 см, су деңгейінің бір тәулікте көтерілуі +3 см, тасқын басынан бері жалпы көтерілу 243 см.

Су деңгейі одан әрі көтеріледі деп күтілуде.

«28 сәуірдегі жағдай бойынша Иректі су қоймасынан секундына 192 текше метр су төгілді» делінген хабарламада.