«Ата-аналар ұлдарын мемлекетке сеніп тапсырды»: Тоқаев әскердегі былықтар жайлы сөйледі

Президент ата-аналар өз ұлдарын мемлекетке сеніп тапсырғанын, сол себепті әскерге ерекше жауапкершілік жүктелетінін атап өтті.

Бұл туралы Orda.kz хабарлады.

Парламент палаталарының бірлескен отырысында ол әскер қатарына жас жігіттер Отан алдындағы борышын өтеуге баратынын, сондықтан әскердегі заң мен тәртіпті сақтау басты міндет екенін баса айтты.

«Сарбаздар өз міндеттерін лайықты атқаруы үшін Қарулы Күштер мен басқа да күштік құрылымдарда ең алдымен темірдей тәртіпті қамтамасыз ету қажет. Ата-аналар өз ұлдарын мемлекетке сеніп тапсырды, сол себепті әскер мен құқық қорғау органдары басшылығы олардың денсаулығы мен қауіпсіздігіне ерекше жауапкершілік артады», – деді президент.

Еске сала кетсек, әскерге барып мүгедек болып қайтқан Ербаян Мұхтардың ісі жұртты дүр сілкіндірген болатын. Ұлттық ұлан сарбазы әскерде қызмет атқару барысында ауыр жарақат алды. Ал, ресми мәлімет бойынша, ол дәретханада құлап, басын соғып алған. Алайда жігіттің ата-анасы бұл нұсқаға сенбей, оны аяусыз ұрып-соққанын айтты.

Orda.kz осы мәселені көтеріп, сарбаздың туыстарында жеке дәрігерлерге төлейтін қаражат жоқ екенін, мүгедек есебінде жоқ болған соң, ешбір емхана алмай отырғанын жазған болатын. Кейін бүкіл Қазақстан болып еміне ел ақша жиды. Ал құзырлы органдар құжаттарын жасауға көмектесетінін мәлімдеді.