Астанада Тоқаевтың бұрынғы кеңесшісі кісі қолынан қаза тапты

Қазақстан президенті Қасым-Жомарт Тоқаевтың бұрынғы кеңесшісі Ержан Бабақұмаров қаза тапты. Ақпаратты Orda.kz дереккөздері растады. Қазір оқиғаның мән-жайы анықталып жатыр.

Деректерге қарағанда, Бабақұмаровты 29-дан 30-на қараған түні Астанада біреулер соққыға жығып өлтірген. Ержан Бабақұмаров – Алматы қаласының бұрынғы әкімінің орынбасары болып жұмыс істеген.

Қайғылы оқиға 30 қазан түнінде болған. Алдын ала мәліметтер бойынша, Бабақұмаров таныстарымен бірге кеш өткізген. Арасында сөзге келіспеушілік туындап, төбелеске ұласқан. Соның салдарынан алған дене жарақатынан қайтыс болған.

Астана полиция департаменті ақпаратты растады.

«30 қазанға қараған түні Астанадағы мейрамханалардың бірінде таныстар арасында жанжал шыққан. Тергеудің алдын ала дерегінше, «арадағы ұрыс төбелеске ұласқан». Алған жарақаттардан 56 жастағы ер адам оқиға орнында көз жұмған», деп хабарлады полиция.

Күдікті ұсталып, уақытша ұстау изоляторына қамалды.

Ержан Бабақұмаров 1990-жылдары еңбек жолын Алматы әкімі аппаратының құрамында бастаған. Кейін Президент әкімшілігіне ауысып, ішкі саясат бағытын қадағалады және Назарбаевтың тұсында Ақпарат орталығын басқарды. 2006 жылы мәдениет вице-министрі болып тағайындалып, кейін премьер-министр Кәрім Мәсімовтің кеңсесінде жұмыс істеді.

2019 жылы ол Қасым-Жомарт Тоқаевтың кеңесшісі атанды. Сол жылы Алматы әкімінің орынбасары қызметін атқарды. Қаңтар оқиғасынан кейін Бақытжан Сағынтаевпен бірге қызметінен кеткен. Соңғы лауазымы — президент жанындағы Орталық коммуникациялар қызметінің директоры.

Бабақұмаров 56 жаста еді. Артында жұбайы, ұлы мен қызы қалды.

Қаңтар оқиғаларынан кейін ол көпшілік назарынан алшақ болған. Соңғы рет биыл көктемде сұхбат беріп, саясат тақырыбында сараптамалық пікір білдірген. Биыл ақпанда Бабақұмаров мас болып көлік жүргізгені үшін ұсталып, сот шешімімен жүргізуші куәлігінен айырылған.

Еске сала кетейік, Қазақстан бір палаталы парламентке көшуге дайындық жүргізіп жатыр. Алайда ел президенттік басқару жүйесін сақтап қалады. Бұл жөнінде мемлекеттік кеңесші Ерлан Қарин журналистермен кездесуінде мәлімдеді. Кездесу жабық форматта өтті, шақырылғандар тізімінде тек «қажетті» басылымдар болды.