Аризона Университеті АҚШ-та оқығысы келетін талапкерлерді қос диплом алуға шақырды

Аризона Университетінің (АҚШ) халықаралық бағдарламалар жөніндегі вице-президенті доктор Дженни Ли қазақстандық талапкерлерді қос дипломның бірлескен білім беру бағдарламаларына қатысуға шақырды, деп хабарлайды Orda.kz.

Қазақстанның Ғылым және жоғары білім министрлігінің ақпараты бойынша бағдарламаларды М.Қозыбаев атындағы Солтүстік Қазақстан университетімен (СҚУ) бірлесіп іске асырып жатыр.

«135 жылдан астам академиялық жетістіктері бар әлемдік деңгейдегі университет ретінде біз сапалы және беделді білім беруге жаһандық қолжетімділікті кеңейтуге ұмтыламыз. Біздің Қозыбаев университетімен серіктестігіміз - осы мақсатты ұстанатынымыздың айқын дәлелі», - деп мәлімдеді Ли. 

Ынтымақтастық аясында Biotechnology, Educational Psychology және Information Systems in Management бағыттары бойынша бағдарламалар іске асырылуда. 2026 жылы бағдарламалар тізбесі Business және Medicine бағыттарымен толықтырылатын болады.

Оқыту ағылшын тілінде жүргізіледі. Бағдарлама аясында студенттер Аризона университетінде бір семестрден өтеді. Оқуға қолжетімділік гранттық негізде де, ақылы негізде де беріледі. Төрт жылдық курсты аяқтағаннан кейін түлектер - қазақстандық және американдық екі диплом алады.

Бұған дейін ІІМ жоғары оқу орындарында білім беру бағдарламалары жаңартылғаны белгілі болды.