Алматының жыр болған лас ауасы Джо Роганның подкастында айтылды

2022  жылы Алматыда рапидтан  әлем чемпионатында жеңіске жеткен атақты норвегиялық шахматшы Магнус Карлсен Алматы қаласының лас ауасын сынға алды, деп хабарлайды Orda.kz.  

20 ақпанда Карлсен америкалық актер Джо Роганның подкастының қонағы болды. Әңгіме шахматшының шаңғы тебуінен кейін киім ауыстыруды ұмытып кеткен қызықты оқиғасына ауысып, бір сәтте норвегиялық спортшы Алматы сапарын еске алды. 

«Шахматтан әлем чемпионаты күтпеген жерлерде өткізіледі. Бұл жолы ол Қазақстанның Алматы қаласында өтті. Ол қыстың өзінде ауасы тазармайтын, аса жағымды дей қоймайтын қала», – деді Магнус Карлсен.

Шахматшы Алматының қысы мен ауасы жақпаса да таулары оны қатты таңғалдырғанын айтты 

«Қаладан небәрі жарты сағаттық жолда – Альпі сияқты үш жарым шақырымға көтерілетін керемет таулар бар. Бұл нағыз фантастика. Яғни, қаладан бір сағаттық жерде – сіз тау шыңындасыз және керемет шаңғы демалысын тамашалай аласыз», - деді Карлсен.

Шахматшы Алматыда болған кезінде лас ауаның оның жағдайына әсер еткенін мойындады. Бұл оның ойынына да белгілі бір дәрежеде ықпал еткен.  

«Маған қалада, төменде болу соншалықты жайсыз болды, сондықтан мен бүгін бар күшімді саламын, өйткені маған таза ауа керек, маған бұл жерден шығу керек деп ойладым. Сол үшін тәуекелге бардым», – деді гроссмейстер.

Магнус Карлсен Алматыға 2022 жылдың соңында келіп, рапид бойынша әлем чемпионатында жеңіске жеткен. Турнир барысында норвегиялық шахматшы сегіз партияда жеңіске жетіп, бір рет жеңіліп, төрт ойынды тең аяқтаған.  

Өткен жылдың желтоқсанында Алматыны швейцариялық IQAir компаниясы жасаған «Әлемнің ең лас мегаполистері» онлайн-рейтингіне енгізген.