Алматыдағы әскери бөлімнен қашқан сарбаз Семейде ұсталды

Алматыдағы әскери бөлімнен өз бетімен кетіп қалған сарбаз Б. Семей қаласынан табылды, деп хабарлайды Orda.kz тілшісі.

Қазіргі уақытта оны жергілікті полиция қызметкерлері ұстап, әскери полицияға тапсырды. Құқық қорғау органдары оның не себепті борышынан бас тартып, белгісіз бағытқа кеткенін анықтап жатыр.

2006 жылы туған Б. 2025 жылдың сәуірінде Екібастұз қаласынан әскерге шақырылған. Павлодар облысы Екібастұз қаласына бет бұрып, Семей арқылы сол жаққа баруды жоспарлауы мүмкін деген болжам бар.

Ол Алматы қаласындағы 61993 әскери бөлімінде қызмет еткен. 23 маусым күні он сарбаздан құралған жұмыс тобымен бірге Алматыдағы Орталық спорт клубына (ЦСКА-ға) іссапарға жіберілген. Алайда 27 маусымда кешкі сағат 20:00 шамасында Алматыдағы әскери бөлімге қайтуы тиіс болған сарбаз саптан табылмай, бейнебақылау арқылы сағат 17:21-де Орталық спорт клубының бақылау-өткізу пунктінен жалғыз шыққаны анықталған.

Қазіргі таңда әскери полиция тергеу жүргізіп жатыр. Сарбаздың әрекетіне құқықтық баға тергеу нәтижесі бойынша берілмек.