Алғыс айту күні: қонағыңның алтынын алма, алғысын ал!

Пандемия ел ішіндегі мейрамдар мен іс-шараларға өзінің кесірін тигізіп жатыр. Ендеше ол адамдарға алғыс айтуға бөгет жасай ала ма? Алғыс айту күні және оның осы жылы қалай аталып өтілетіндігі туралы ORDA анықтап білді.

Алғыс айту күні туралы бүкіл әлем біледі. Біле тұра барлығы бірдей тойламайды. Мейрам тек АҚШ пен Канадада атап өтіледі. Негізінен алғыс айту күні XVII ғасырда пайда болған. Мақсаты – қолыңда барға қанағат жасап, жақындарыңа рақметіңді айту.

Бұл мейрам осыдан бес жыл бұрын, 2016 жылы Елбасы Нұрсұлтан Назарбаевтың бастамасымен Қазақстанға енгізілді.

Адамдар мейрамды бірден іліп әкетіп, бір-біріне жаппай алғыстарын білдірді. Алғашқыда мейрамның негізгі мақсатын халық дұрыс түсінбеді. Кейіннен алғыс айту күні 1 наурызға жәйдан-жәй қойылмағаны белгілі болды.

Ризашылық күнінде Қазақстан өзін қиын кезеңдерде миллиондаған иммигранттар қабылдаған қонақжай мемлекет ретінде танытады.

Көптеген тарихи оқиғалар республикада 17 діни ағымның қалыптасуына және 130 этносты бір ту астына жинауға себеп болды. ХХ ғасырда Қазақстанға Ресейден, Украинадан және Беларуссиядан бес миллионға жуық адам қоныстандырылды. Негізінен оның бәрі халықтың қалауымен емес, жүргізіліп жатқан реформалардың нәтижесі болды. Қоныс аударушыларды қазақтың ашықтығы, қайырымдылығы, қонақжайлылығы мен достығы құтқарды.

Қазақтардың өздері де қиын тұрмыстық және экономикалық жағдайда болса да, адамдарды өз үйлерінде паналатты.

Не себепті 1 наурыз Алғыс айту күні болып бекітілді?

1995 жылы 1 наурызда Қазақстан Халқы Ассамблеясы құрылған. Ол халықтар бірлігін қалыптастырып, оны сақтаушы қызметін атқарады.

1 наурыз өзге ұлт өкілдері қазақ халқының қонақжайлығына алғыс айту күні болса, 1 мамыр – Қазақстан халықтарының бірлігі күні. Екі мейрам да 130 ұлт өкілдерін тату өмір сүруге шақырады.

Мейрам қалай атап өтіледі?

Америка мен Канада да алғыс айту күні түйетауық пісіріп, жақындарының ортасында атап өтіледі. Ал Қазақстанда мереке күні түрлі флешмобтар, концерттер, қойылымдар, кездесулер, қайырымдылық шаралары ұйымдастырылады.

Бес жыл қатарынан осындай көрініс тапқан мерекеге пандемия қаншалықты әсер ететіні белгісіз.