Ақтөбеде адамдарды кепілге алған азамат 2 айға қамалды

Ақтөбеде адамдарды кепілге алып, екі адамның өліміне себепкер болған күдікті екі айға қамалды, деп хабарлайды Orda.kz. 

Бұл туралы Ақтөбе облыстық сотының баспасөз қызметі мәлімдеді. Тергеу соты санкция шығарды. Ал зардап шеккен әйел емін жалғастырып жатыр. 

Еске салайық, Ақтөбеде 3 адамды кепілге алған ер адам ұсталды. Әйелдің ата-анасы алған жарақатынан мерт болды. 40 жастағы әйел есін жиды. Бірақ ата-анасының қазасы туралы әлі білмейді.

Мәліметтерге сүйенсек, ер адам әйелмен бірге тұрған. Сондықтан қылмыс болатын күні ол әйелдің ата-анасының үйіне оңай кіріп кеткен екен. Әйел ата-анасының үйінде тұрмаған, сол күні ол  қонаққа барған. Күдікті үйге кіре салып, әйелдің 74 жастағы өгей әкесіне және 67 жастағы анасына пышақ жарақатын салған. Ер адам оларға жарақат салғаннан  кейін, сүйіктісін басқа бөлмеге қамап, денесін пышақпен тілгілеп, ұрып-соққан. Бұл кезде әйелдің 17 жастағы ұлы үйде болмаған. Жігіт үйіне келгенде, қан іздерін көріп, дереу туыстарын көмекке шақырған. Ал олар полицияға хабарласқан.

Тәртіп сақшылары күдікті Б-мен үш сағат бойы келіссөз жүргізді, бірақ ол ешқандай талап қоймағандықтан және кепілге алынғандарды босатпағандықтан, үйге басып кіруге тура келген.