Ақсу қалалық сайлау комиссиясының төрағасы жол апатынан көз жұмды

Павлодар облысының Ақсу қаласында қалалық сайлау комиссиясының төрағасы жол-көлік оқиғасынан қаза тапты. Ер адамды екі көлік соққан, деп хабарлайды Orda.kz.

Оқиға 6 қазан күні кешке қала әкімдігі маңында болған. Куәгерлердің айтуынша, ер адам жолдан өтіп бара жатқан сәтте көлік қағып кеткен. Жолдың ортасына құлаған азаматты артынан келе жатқан тағы бір көлік басып өткен.

Павлодар облыстық полиция департаменті бұл ақпаратты растады.

«ВАЗ-21213 автокөлігінің жүргізушісі жаяу жүргіншіні қағып кеткен. Артынан келе жатқан ВАЗ-21070 автокөлігінің жүргізушісі де жерде жатқан ер адамды басып өтіп, оқиға орнынан қашып кеткен»,  деп хабарлады Павлодар облыстық полиция департаменті.

Ресми деректерге сай, екі жүргізуші де ұсталды.

Қайтыс болған 57 жастағы Айдос Оразалин бұған дейін мәдениет бөлімін және қалалық су арнасын басқарған. Соңғы жылдары Ақсу аумақтық сайлау комиссиясының төрағасы қызметін атқарған.

Айта кетейік, 6 қазан күні Маңғыстауда бензин буына уланған сарбаз қаза тапты.