Ақмарал Әлназарова Үржардағы жол апатынан зардап шеккен балалардың жағдайын білуге келді

Денсаулық сақтау министрі Ақмарал Әлназарова Абай облысы Үржар ауданы Бестерек ауылындағы көлік апатынан аман қалған балалардың жай-күйін білуге келді, деп хабарлайды Orda.kz.

Шұғыл түрде ұшақпен елордаға жеткізілген 9 және 6 жастағы балалар ауыр халде жансақтау бөлімінде жатыр. Олар Астанадағы №2 қалалық балалар ауруханасына жатқызылған.

Министр мен қалалық денсаулық сақтау басқармасының басшысы балалардың жағдайын білгеннен кейін, олардың анасымен сөйлесті. Дәрігерлер барлық қажетті көмек көрсетіліп жатқанын айтты. 
Ал жол апатынан зардап шеккен 9 жастағы қыз жағдайының ауырлығына байланысты Астанаға келмеді. Ол жансақтау бөлімінде жасанды тыныс алу аппаратына қосылған. Астанадан келген дәрігерлер бірнеше күрделі операция жасағанымен, әлі өзгеріс жоқ.

Айта кетейік, 19 тамыз күні сағат 16:00 шамасында Бестерек ауылында 55 жастағы Toyota автокөлігінің жүргізушісі рөлге ие бола алмай, үй қақпасының жанында, жолдан шамамен 10 метр қашықтықта тұрған балаларды қағып кеткен еді. Апаттан оқиға орнында 3 бала көз жұмды.