Әйелін ұрып-соғып үш айлық баласын лақтырған

Шымкентте ер адам әйелін ұрып-соғып, үш айлық баласын лақтырып жіберген.

Бұл туралы әлеуметтік желіде заңгер Айгүл Орынбек мәлімдеді.

53 жастағы ер адам әйелін пышақпен қорқытып, үш айлық қызын теуіп, лақтырып жіберген. Қалалық аурухана әйел мен сәбиді қабылдаудан бас тартқан. Салдарынан сәбидің басына қан құйылып, жансақтау бөліміне жатқызылды.

Бала құқықтары жөніндегі уәкіл Динара Зәкиева бұл істі жеке бақылауына алғанын айтты.

Шымкент полиция департаменті болған оқиғаны растады. Ер адам ұсталып, оған денсаулыққа қасақана зиян келтірді деген айып тағылды.

«Аталған факті бойынша қылмыстық іс қозғалды. Күдікті қамауға алынды. Сот-медициналық сараптама тағайындалды. Тергеу шаралары жүргізілуде», - деді ведомство.