600 мың теңгелік торт: Кондитер мен танымал блогер арасындағы жанжал өршіді

Кондитер Нұршат Ақбергенова белгілі блогер Әселина Батырға жасаған торты үшін ақы ала алмағанын мәлімдеді, деп хабарлайды Orda.kz.

Оның айтуынша, тапсырыс беруші мерекелік шараға арналған 18 келілік торт үшін төлем жасамаған.

Нұршат Ақбергенованың сөзіне қарағанда, ол тортқа қажетті өнімдерді жеке қаржысынан сатып алып, 440 мың теңге жұмсаған. Жобамен төрт адам бір апта бойы жұмыс істеген.

«Тапсырыс беруші тортты алып кетті, бірақ бір апта бойы төлем жасаған жоқ. Кейін мені әлеуметтік желіде бұғаттады», — деді ол.

Кондитер өзін екі баланы жалғыз асырап отырғанын атап өтті.

Ал блогер Әселина бұл айыптаулармен келіспейтінін мәлімдеді. Оның айтуынша, торттың бағасы алдын ала келісілмеген. Ол 100 мың теңге алдын ала төлегенін, бірақ мереке өткеннен кейін 600 мың теңге көлемінде шот алғанын айтты.

«Бағаны тапсырыс алдында да, тортты алғанда да айтпады. Мен ең көп дегенде 300 мың теңге төлеуге дайын болдым. 600 мың теңгені алдын ала келіспей сұрау — дұрыс емес», — деді ол.

Сондай-ақ блогер бұл жағдайды «әлеуметтік желі арқылы қысым көрсету» деп бағалады. Қазір екі тарап та өз ұстанымдарын әлеуметтік желіде жариялап, көпшілікке үндеуде.

Ал әлеуметтік желі қолданушылары осы жағдайға байланысты әзілдей бастады.